Nagpagawas og prangka ug mahait nga pamahayag ang aktres nga si Angel Locsin batok kang Senator Robin Padilla human kini miangkon nga usa ka “komunista” taliwala sa nagpadayong impeachment trial ni Vice President Sara Duterte.
Sa iyang social media post, binalikan ni Locsin ang mga panahon nga suod pa sila sa senador diin kanunay matod pa kining mag-istorya mahitungod sa iyang pagpamundok ug paggunit og armas alang sa nasod kaniadto. Apan, prangkang gipangutana sa aktres kon nganong nagpabiling hilom si Padilla sa dihang siya ang paulit-ulit nga gipailalom sa red-tagging, bisan pa man og nasayod ang senador nga dili tinuod ang mga pasangil batok kaniya.
Gawas niini, gikwestiyon usab ni Locsin ang dako nga pagsuporta sa senador ngadto kang Pastor Apollo Quiboloy nga nag-atubang og mga seryosong kaso, ingon man ang kontrobersyal niining baruganan pabor sa nasod sa China nga layo ra kaayo sa iyang naandan nga imahe isip usa ka makabayan. Sa katapusan, nanawagan ang aktres kang Padilla nga magmata na (“gising na, Kuya”) ug dili pa ulahi ang tanan aron usbon ang iyang kasamtangang panindugan.