Gihulagway sa House prosecution panel nga kapakyasan ang presentasyon sa depensa ni Vice President Sara Duterte human kuwestiyonon ang kredibilidad sa ilang unang testigo nga si Davao City Assessor Engineer Jaime Adalin atol sa impeachment trial sa Senado.
Matod ni Surigao del Norte Representative Robert Ace Barbers, wala direktang natubag ni Adalin ang mga pangutana sa prosekusyon, ilabina sa mga kabtangan ni Duterte nga nalambigit sa alegasyon sa unexplained wealth. Gikuwestiyon usab ni Manila Representative Joel Chua ang iyang pagkamatinud-anon ug posibleng pagkiling tungod sa iyang pagkapili isip assessor sa panahon nga mayor pa si Duterte sa Davao City.
Gipangutana usab sa prosekusyon ang 25 ka adlaw nga biyahe ni Adalin ug sa iyang grupo sa China, lakip na kung kinsa ang mibayad sa ilang mga gasto ug ang posibleng koneksiyon niini sa gikuwestiyong 319-million-peso remittances gikan sa China ngadto sa Party 88.
Sa laing bahin, gikuwestiyon ni prosecution legal spokesperson Attorney Benjamin Tolosa Jr. ang nag-usab-usab nga tubag ni Adalin bahin sa maong biyahe, diin una siyang miingon nga dili niya kini mahinumduman apan sa ulahi miangkon nga siya mismo ang mibayad sa iyang mga gasto.