Nadiskubre sa gipahigayong random drug testing sa Dakbayan sa Valencia, Bukidnon sa milabayng semana, diin ang positibong resulta sa usa ka regular nga empleyado sa lokal nga pangagamhanan ug pipila ka barangay kagawad.
Base sa impormasyon sa Bombo Radyo Malaybalay atol sa eksklusibong pakighinabi kang Consultant ug Former City Mayor Jun Galario, usa sa mga nagpositibo mao ang regular nga empleyado nga giilang si alyas “Bukoy”. Gikumpirma usab nga adunay kagawad sa Barangay Colonia nga nalambigit sa maong drug testing, apan kasamtangang gina-beripikar pa ang resulta, nagdumili usab ang lokal na kagamhan na nganlan ang maong opisyal.
Matod pa ni Galario, mahitungod gamay pa lamang ang na-exam nga mga empleyado gikan sa kapin 280 ka persona, ug adunay nanglikay sa drug testing nga posibleng pasakaan og kaso ug tangtangon sa trabaho kon mapamatud-ang milapas sa polisiya.
Ang maong kalihokan gipangulohan ni Mayor Amie Galario ubos sa Drug-Free Workplace Policy aron mapalig-on ang integridad ug kredibilidad sa serbisyo publiko. Ang mga nagpositibo ipailawom sa confirmatory test ug posibleng rehabilitasyon o disciplinary action depende sa resulta.
Sa pagkakaron, padayon ang imbestigasyon ug beripikasyon sa mga otoridad aron masiguro ang malimpyo nga serbisyo publiko sa Dakbayan sa Valencia.