Gipadayag ni Bicol Saro Partylist Rep. Terry Ridon nga dili na kinahanglan pa nga ibalhin sa kustodiya sa Kamarabaha si Ramil Madriaga gikan sa iyang kasamtangang detensyon sa Bureau of Jail Management and Penology sa Camp Bagong Diwa.
Sumala ni Ridon, mahimo ra kini kung wala nay dugang pangutana ang komite kang Madriaga ug kon maayo ang koordinasyon tali sa BJMP ug sa Kamarabaha, pinaagi sa korte nga may hurisdiksyon sa kaso sa giingong kanhing bagman ni VP Sara Duterte.
Una pa niini, pipila ka miyembro sa House Justice Committee ang mihangyo nga ibalhin si Madriaga sa kustodiya sa Kamarabaha tungod sa giingong hulga sa iyang kinabuhi.
Apan matud usab sa komite nga posible pa nilang ipatawag pag-usab si Madriaga sa sunod nga mga pagdungog sa duha pa ka nahibiling reklamo.
Matod ni Ridon, kung adunay dugang pangutana ang ubang miyembro sa Kamara, mahimo ra silang mangayo og permiso sa korte aron ipabalik si Madriaga isip resource person sa hearing.
Kahinumuduman nga sa unang pag-atubang ni Madriaga sa pagdungog sa Kamarabaha, gihatagan kini sa korte og oras gikan alas-10 sa buntag hangtod alas-5 sa hapon aron motambong sa hearing ug mobalik dayon sa iyang detention cell sa Camp Bagong Diwa.
Nagdugay usab og pila ka oras ang testimonya niini samtang gitubag niya ang mga pangutana sa mga mambabalaod.