University of Calgary sa Alberta, nakatala og Guinness World Record human sa dinosaur costume gathering

Nakatala og bag-ong Guinness World Record ang University of Calgary sa Alberta, Canada human nagtapok ang 682 ka tawo nga nagsul-ob og dinosaur costumes isip selebrasyon sa ilang ika-60 nga anibersaryo.

Gipahigayon ang maong tapok-tapok sa gawas sa Taylor Family Digital Library niadtong Sabado, diin gipili ang temang dinosaur tungod kay nailhan ang ilang sports teams isip “Dinos.”

Nalabwan sa maong gidaghanon ang kanhi rekord nga 468 ka partisipante gikan sa Florida sa miaging tuig human kini opisyal nga gi-beripika sa Guinness World Records adjudicator.

Mapasigarbohong gipahayag ni Ed McCauley, presidente sa unibersidad, nga “extinct” na ang karaan nga rekord ug kini nagpamatuod lamang sa lig-on nga panaghiusa sa komunidad sa Calgary.