Gipahibalo ni Manila Representative Joel Chua nga posibleng mag-atubang og election offense si Bise Presidente Sara Duterte kung mapamatud-an nga nakadawat kini sa iyang 2022 campaign nga pondo gikan sa mga Chinese nationals nga may kalabotan sa Pharmally Pharmaceutical Corporation.
Gipasabot ni Chua nga gidili sa Omnibus Election Code ang pagdawat og kontribusyon gikan sa mga langyaw, ug kung mapamatud-an, mahimo kining ikonsidera nga “culpable violation of the Constitution” ug mahimong basehan sa impeachment.
Nag-ugat ang alegasyon sa pahayag ni Ramil Madriaga nga mibutyag nga nakadawat siya og minilyon nga kantidad gikan kang Lin Weixiong ug negosyanteng si Maestrado Lim alang sa kampanya ni Duterte pinaagi sa usa ka non-profit group.
Gibutyag ni Chua nga kinahanglan klaro kung kini nga mga pondo nadeklara ba sa Statement of Contributions and Expenditures (SOCE), samtang nagpabiling abri ang House Committee on Justice sa pagdawat sa bahin sa bise presidente nga wala pa makatambong sa mga pagdungog.