Nanawagan si Senator Francis “Kiko” Pangilinan sa Department of Agriculture (DA) nga mamahimong gamiton ang gibanabanaang P18 bilyon nga wala pa magamit nga pondo gikan sa 2025 budget aron pondohan ang fuel ug fertilizer subsidies para sa mga mag-uuma ug mangingisda.
Matud niini nga dili na angay malangan ang pagpagawas sa pondo tungod kay apektado na ang sektor sa agrikultura ug pangisda sa pagsaka sa gasto tungod sa tensyon sa Middle East.
Gipunto usab sa senador nga ang maong pondo makatabang sa pagpagaan sa paalas-anon sa mga local producer ug malikayan ang dugang pagsaka sa presyo sa pagkaon sa merkado.
Dugang pa niini, ang P18 bilyon lahi pa sa gitugot na nga P10 bilyong ayuda para sa kapin 4.1 ka milyon nga mag-uuma ug mangingisda sa tibuok nasud.
Nagpahimangno usab kini nga kung dili muakksyon ang gobyerno, posibleng mosamot pa ang krisis sa suplay sa pagkaon tungod sa pagsaka sa presyo sa lana ug abono sa kalibutan.