Gisuportahan ni Archbishop of Canterbury Sarah Mullally si Pope Leo XIV sa iyang panawagan alang sa kalinaw sa tanang nasud sa kalibutan.
Gihagit niini ang 85 milyones ka mga Anglicans sa tibuok kalibutan nga maningog alang sa kalinaw, human sa sunod-sunod nga kritisismo ni US Pres.Donald Trump batok sa Santo Papa tungod sa iyang pagkomento sa gubat sa Iran.
Gibutyag usab ni Mullally ang grabe nga epekto sa gubat sa mga sibilyan, lakip ang kamatayon sa mga inosente, pagkabungkag sa mga pamilya, ug pagkawala sa kaugmaon sa daghang tawo.
Sa laing bahin, una nang gikondena ni Pope Leo XIV ang mga lider nga mogasto og binilyon nga dolyares alang sa gubat, ug mibutyag nga ginadaot sa pipila ka gamhanang lider ang kalibutan.
Gisaway usab sa Santo Papa ang paggamit sa relihiyon isip rason sa mapintas nga panagbangi.