Nagdala og pasidungog human makasakmit og duha ka kampeonato ang Pilipinas gikan sa Pony International Softball World Series sa McAllen, Texas, diin nagkampeon ang Manila sa 18-under division ug ang Sagay City sa 14-under division.
Gipildi sa Manila ang Pride Elite sa Estados Unidos, 8-1, aron masungkit ang titulo sa 18-under division.
Samtang gipilde sa Sagay City ang RXII Kino sa Mexico, 4-2, aron mahimong kampeon sa 14-under division.
Ikatulong kampeonato na kini sa Manila sa miaging upat ka edisyon sa maong torneo, samtang nabawi sa Sagay City ang korona nga ilang nadaog duha ka tuig na ang milabay.
Matud ni Manila coach Sheirylou Valenzuela, malipayon kini gumikan nabawi nila ang titulo human mapildi sa miaging tuig.
Samtang sa Japan, gipakuratan usab sa Philippine 12-under team human mapildi ang host nga Japan, 8-4, sa All-Japan Championship.