Napili ang Pilipinas isip host country sa katapusang window sa FIBA World Cup Asian Qualifiers.
Human sa pag-host sa nasud sa Window 4 batok sa Jordan ug Iran niadtong Agosto 28 ug 30, mobalik na usab sa Pilipinas ang mga dula sa sunod nga bahin sa qualifiers.
Sa Window 5 karong Nobyembre, atubangon sa Gilas Pilipinas ang Syria sa Nobyembre 27 ug Iran sa Nobyembre 30.
Sa Window 6 sa Pebrero 2027, makigsangka ang Gilas sa Jordan sa Pebrero 25 ug Syria sa Pebrero 28.
Sa pagkakaron wala pa gipahibalo ang eksaktong venue diin himuon ang mga dula sa Pilipinas.
Apan sa Group E, adunay upat ka daog ug upat ka pildi ang Pilipinas.
Nag-una sa grupo ang Australia nga adunay walo ka daog ug walay pildi, gisundan sa New Zealand nga adunay unom ka daog ug duha ka pildi.
Ang Iran ug Jordan parehong adunay lima ka daog ug tulo ka pildi, samtang anaa sa kataposang puwesto ang Syria nga adunay duha ka daog ug unom ka pildi.
Sa Group F, nanguna ang Japan ug Lebanon nga parehong adunay unom ka daog ug duha ka pildi, gisundan sa China nga adunay lima ka daog ug tulo ka pildi.
Makakuha og puwesto sa 2027 FIBA World Cup ang mga team nga mahuman sa Top 3 sa matag grupo, apil ang best fourth-placed team gikan sa Group E o Group F.