Nakigpulong si Presidente Ferdinand R. Marcos Jr. sa mga nag-unang lider sa negosyo gikan sa India atol sa Executive Roundtable Discussion, diin gihisgutan ang mga plano sa pagpalapad sa ilang operasyon sa Pilipinas.
Lakip sa mitambong ang mga executive sa Cognizant, VVDN Technologies, Hinduja Group ug HCLTech, nga anaa na ang presensya sa Pilipinas.
Sumala ni Trade Secretary Maria Cristina Roque, positibo ang ilang pagtan-aw sa mga polisiya sa ekonomiya sa administrasyong Marcos ug sa ilang kasinatian sa pagnegosyo sa nasud.
Gipahayag ni Roque nga nakatutok ang mga kompanya sa pagpalapad sa ilang operasyon ilabina sa teknolohiya, digitalization, artificial intelligence ug telecommunications, tungod sa ilang positibong kasinatian sa Pilipinas.
Gilauman nga ang maong mga expansion plan makatabang sa pagpalig-on sa trade ug investment relations tali sa Pilipinas ug India, lakip ang pagmugna og dugang high-value job opportunities alang sa mga Pilipino.