Himas rehas ang usa ka 20-anyos nga dalaga human nasikop sa gikasang entrapment operation sa mga personahe sa Regional Anti-Cybercrime Unit (RACU) 10 Bukidnon batok sa ilegal nga pagpraktis sa pagka-dentista niadtong Abril 24, 2026.
Ang suspek, nga giila sa alyas nga “Amana” ug residente sa Balangay 2, Poblacion, Quezon, Bukidnon, nasikop pasado alas 3:40 sa hapon human nakuhaan og nagpungasi nga mga dental supplies sama sa ceramic brackets, niti wires, bonding agents, ug uban pang mga kagamitan sa pag-brace ug paglimpyo sa ngipon nga walay legal nga permiso.
Nakuha usab gikan niini ang duha ka cellphone, cash, ug boodle money nga gigamit sa operasyon.
Sa kasamtangan, ang dinakpan nagtingkagol na sa selda sa RACU 10 ug gikatakdang pasakaan og kasong paglapas sa RA 9484 o ang Philippine Dental Act of 2007 nga adunay kalambigitan sa RA 10175 o ang Cybercrime Prevention Act of 2012.