Kabsan sa kinabuhi human gipusil-patay ang usa ka lalaki nga naila sa alyas nga Benjie sa nahitabong pagpamusil pasado alas 5:40 sa buntag karong adlawa, Abril 26, 2026, sa Hagkol, Barangay Bagontaas, Valencia City. Ang biktima usa ka 53-anyos ug residente sa Purok 4, Sugarland, Brgy. Lumbo, Valencia City.
Sumala sa inisyal nga imbestigasyon, padulong matud pa ang biktima sa fish landing area sa maong barangay aron mangumpra og isda sa dihang kalit kining gipusil sa wala mailhing suspek sa atubangan mismo sa Robinsons Place.
Tungod sa seryosong samad nga naangkon sa nagkalain-laing bahin sa iyang lawas, wala na matabang ang biktima ug gideklarang nakabsan sa kinabuhi.
Padayon pa karon ang gihimong pursuit operation ug lawom nga imbestigasyon sa Valencia City Police Station aron mailhan ang mamumuno ug masuta ang tinuod nga motibo luyo sa maong krimen.