Nagtingkagol na karon sa selda sa kapulisan ang usa ka 40-anyos nga lalaki human kini gisilbiwan og warrant of arrest tungod sa kasong may kalabutan sa ilegal nga droga kaganihang gabii sa Balangay 1C, Poblacion,Quezon Bukidnon.
Giila ni Bukidnon Police Provincial Director PCOL Oliver Sotto Navales ang dinakpan nga si Ronald Loreto Abul, residente sa maong dapit. Ang malampusong operasyon gipangulohan sa Quezon Municipal Police Station ubos sa pagdumala ni PLTCOL Erwin R. Naelga, uban ang pwersa sa Bukidnon 2nd Provincial Mobile Force Company ug Bukidnon PIU.
Gidakop ang suspek pinasikad sa mando sa korte tungod sa paglapas sa Sections 5 ug 11 sa Republic Act 9165 o ang Comprehensive Dangerous Drugs Act of 2002. Subay sa kamanduan sa korte, walay piyansa nga girekomendar alang sa iyang temporaryong kagawasan. Sa pagkakaron, ang dinakpan anaa na sa kustodiya sa Quezon MPS alang sa hustong dokumentasyon ug disposisyon sa iyang kaso.