Nagpabiling kontrobersyal ang Pax Silica project human sa ikalimang State of the Nation Address (SONA) ni Presidente Ferdinand Marcos Jr., diin gipadayag sa pipila ka progresibong grupo ang ilang pagsupak tungod sa kabalaka sa epekto niini sa kalikupan ug suplay sa mga batakang serbisyo.
Gipahibalo sa mga grupo ang ilang panawagan batok sa proyekto pinaagi sa rally sa Elliptical Road sa Quezon City kagahapong adlawa, diin ilang gipakita ang mensahe nga “No to Pax Silica.”
Ang Pax Silica usa ka inisyatiba nga gipangulohan sa Estados Unidos nga nagtumong sa pagpalig-on sa industriya sa artificial intelligence o AI ug semiconductor, lakip ang pagsiguro sa suplay sa computer chips.
Kabahin sa plano niini ang pagtukod og usa ka dakong industrial hub sa New Clark City, Tarlac alang sa pagproseso sa mineral ug paghimo og mga gamit nga may kalabotan sa AI technology. Matud sa gobyerno, ang proyekto mahimong magdala og daghang trabaho, mas taas nga kita, ug bag-ong oportunidad sa sektor sa teknolohiya.
Apan, nagpabilin ang kabalaka sa pipila ka grupo bahin sa posibleng epekto niini sa konsumo sa tubig ug kuryente, kadaot sa kalikupan, ug ang papel sa Pilipinas sa kompetisyon sa dagkong nasod.
Gipaabot sa mga kritiko nga kinahanglan adunay mas lawom nga pagtuon ug transparency sa proyekto, samtang ang gobyerno nagtan-aw sa Pax Silica isip bahin sa pagpalig-on sa teknolohiya ug industriya sa Pilipinas.