Nakaplagang wala na nay kinabuhi ang usa ka 39-anyos nga lalaki sa Purok 6, Sitio Kimongkaw, Barangay Natulongan, Kibawe, takna alas 9:00 sa buntag kagahapong adlawa.
Matud sa taho, pag-abot sa lugar, nakita sa responding team ang motorsiklo sa biktima nga natumba daplin sa karsada.
Nakit-an usab sa imbestigador ang nagkalain-laing butang nga nagkatag sa palibot sa lugar, usa ka rubber sandal nga mga 10 metros gikan sa motorsiklo ang usa ka taguban (scabbard) sa hunting knife nga mga 150 metros ang gilay-on; ug usa ka pares nga itom nga botas nga adunay makita nga dugo nga mga 200 metros gikan sa motorsiklo.
Mga 300 metros gikan sa motorsiklo, nadiskubrehan sa imbestigador ang lawas sa lalaki nga naghigda daplin sa barangay road.
Sa inisyal nga external examination nga gihimo sa duty investigator, nasuta nga naangkon ang biktima og daghang samad dinunggaban.
Base sa inisyal nga imbestigasyon, alas 7:30 sa buntag sa maong adlaw, usa ka lalaki nga nagbiyahe padulong sa Barangay Bukangliwayway, Kibawe, nakamatikod sa usa ka lalaki nga nagsul-ob og itom nga hooded jacket nga naghigda daplin sa dalan.
Diha-diha niya kining gireport sa Barangay Captain sa Brgy. Natulongan ug nangayo og tabang.
Dugang pa, sumala sa asawa sa biktima, mibya ang iyang bana alas 5:00 sa buntag aron moadto sa ilang umahan sa Purok 6, Sitio Kimongkaw, Brgy. Natulongan, Kibawe, aron magpasibsib sa ilang kalabaw.
Padayon pa ang imbestigasyon sa kapulisan aron mahibal-an ang motibo ug posibleng suspek sa maong krimen.