Patay ang usa ka 39-anyos nga lalaki human kini giatngan ug gipaulanan og bala sa duha ka wala pa mailhing suspetsado sa Barangay 1B, Poblacion, Quezon, Bukidnon, niadtong Abril 10, 2026, mga alas 9:30 sa gabii.
Sa pakighinabi sa Bombo Radyo Malaybalay ngadto kang PCpt. Sheila Joy P. Jangad, ang spokesperson sa Bukidnon Police Provincial Office (BPPO), nasayran nga nagmaneho ang biktima sa iyang motorsiklo dihang kalit kining giatngan sa mga suspek nga armado og .45 pistol ug 9mm nga pistola.
Nakaangkon og daghang samad pinusilan sa nagkadaiyang parte sa lawas ang biktima hinungdan nga dinalian kining gidala sa Quezon Health Infirmary Hospital, apan gideklara kining dead on arrival sa attending physician.
Sa gihimo nga pagsusi sa crime scene, narekober sa mga otoridad ang lima ka basiyo sa kalibre .45, siyam ka basiyo sa 9mm, ug duha ka fired bullets. Human sa madugoong krimen, daling misibat ang mga suspetsado padulong sa direksyon sa Barangay Minsalirac.Sa pagkakaron, nagpadayon ang gihimong hot pursuit operation ug intelligence build-up sa Quezon Municipal Police Station (MPS) aron mailhan ug madakpan ang mga responsable. Gidugang sa kapulisan nga padayon pa nilang gisusi ang motibo sa krimen pinaagi sa pag-backtrack sa mga posibleng kaaway sa biktima ug pagpangita og dugang mga testigo sa dapit.