Gipahibalo ni Executive Secretary Lucas Bersamin nga gusto mismo ni Pangulong Ferdinand Marcos Jr. nga sugdan ang imbestigasyon batok sa mga palpak nga flood control projects sa nasud. Matud ni Bersamin, kinahanglan nga maila ug mapahibalo sa publiko ang mga opisyal sa gobyerno nga nakigsabwatan sa mga contractors ug nakabenipisyo sa maong mga proyekto.
Gipasabot niya nga ang imbestigasyon mopunting sa pagtino kung kinsa ang nalambigit ug nakakwarta gikan sa mga palpak nga proyekto. Sa iyang State of the Nation Address kon SONA, giingon ni Marcos nga manubag sa balaod ang tanang mapamatud-an nga nakabenipisyo sa anomalya.
Bisan pa man walay gilatid nga deadline ang Malacañang para kang Department of Public Works and Highways (DPWH) Secretary Manuel Bonoan, gipasabot nga importante ang pag-ila kung kinsa gyud ang angay nga manubag.Matud pa ni Bersamin, dili buta ang Presidente sa epekto sa grabeng pagbaha sa nagkalain-laing dapit sa Pilipinas, bisan pa man sa presensya sa daghang flood control projects nga gi-report nga nahuman na. Sa laing bahin, gibutyag ni Secretary Bonoan nga andam na silang isumite sulod sa pipila ka adlaw ang listahan sa tanang flood control projects sa milabay nga tulo ka tuig aron masuta kon kinsa ang responsable sa kapakyasan niini.