Gituohang isyu sa yuta ang motibo sa pagpamusil-patay kang Richard Calo Rama, 48 anyos, Purok Chairman sa Purok-4A, Barangay Aglayan, Malaybalay City, samtang samaran usab ang kapikas niini sa kinabuhi nga si Trexie Mae Del Campo Regacho, 41 anyos.
Sa eklusibong pakighinabi sa Bombo Radyo Malaybalay kang Michael Rama, igsoon sa lalaking biktima, gituohang nalambigit sa re-installation sa yuta ang krimen, diin ang biktima naghawid sa mga papeles sa yuta nga gihatag pinaagi sa gobyerno.
Kahinumdoman nga nahitabo ang insidente pasado alas 9:20 sa gabii sa Disyembre 22, 2025 daplin sa Sayre Highway samtang ang magtiayon sakay sa motorsiklo pauli sa panimalay niini.
Base sa inisyal nga imbestigasyon, gituohang gisundan kini sa duha ka suspek nga sakay og motorsiklo ug gipabuthan sa armas sa ikatulo ka higayon.
Nakaangkon og seryosong samad-pinusilan gikan sa tulo ka igo sa bala si Rama hinungdan sa kamatayon niini, samtang ang pakipikas niini aduna usab samad-pinusilan apan anaa na karon sa luwas nga kahimtang.
Kasamtangang padayon pa ang imbestigasyon sa mga otoridad kabahin sa maong krimen.