Dili kini eksena sa komedya, kundili usa ka tinuod nga kompetisyon sa pagkalot og lubnganan nga gipahigayon sa usa ka sementeryo sa Hungary, diin 38 ka partisipante ang naglumba niadtong Sabado.
Gi-organisar sa Hungarian Association of Cemetery Maintainers and Operators ang kompetisyon aron ipakita ang kahibalo ug kahanas nga gikinahanglan sa mga nag-atiman ug nagkalot og lubnganan, ingon man aron mahupay ang mga bawal ug kahadlok nga kasagarang nalambigit sa kamatayon.
Sa usa ka public cemetery sa Nyergesújfalu sa amihanang Hungary, 19 ka grupo nga adunay tig-duha ka miyembro ang nag-unahay sa pagkalot bisan pa sa uga ug gahi nga yuta.
Gisukod dili lamang ang kapaspas, kondili apil usab ang tukmang sukod ug kahapsay sa pagkahimo sa lubnganan.
Nakapanguna sa kompetisyon sila Róbert Nagy ug László Kiss human nila makompleto ang ilang lubnganan sulod lang sa usa ka oras ug 21 minutos.
Ang ilang gihimong lubnganan adunay giladmon nga 1.6 metros, gitas-on nga duha ka metros ug gilapdon nga 0.8 metros.
Alang sa ilang kadaugan, nakadawat sila og 200,000 Hungarian forints o kapin 640 dolyares nga cash prize.