Gitawag nga usa ka “distraction” o pagpalibog lamang sa publiko ang plano sa pipila ka mga senador sa ipahigayon nga pagdungog sa Senate Blue Ribbon Committee sa gawas sa Senado, sumala kang House spokesperson ug Lanao del Sur Rep. Zia Alonto Adiong.
Matud ni Adiong, ang maong lakang sa pipila ka senador nga giingong kaalyado sa kanhi lider sa Senado usa ka “PR stunt” aron ilihis ang atensyon sa katawhan gikan sa umaabot nga impeachment trial batok kang Bise Presidente Sara Duterte.
Sumala ni Adiong nga ang impeachment trial maoy nag-unang obligasyon sa Senado ubos sa Konstitusyon.
Gipatin-aw usab ni Adiong nga personal nga opinyon niya kini ug dili opisyal nga pahayag sa tibuok House prosecution panel.
Samtang, gipunting sa mga impeachment prosecutors nga San Juan City Rep. Ysabel Maria Zamora ug Batangas Rep. Gerville Luistro nga giila sa Kamara ang pagpangulo ni Acting Senate President Sherwin Gatchalian.
Matud sa mga mambabalaod, bisan pa og adunay kagawasan ang mga senador sa pagpahayag, ang bisan unsang pormal nga pagdungog kinahanglan adunay pagtugot sa bag-ong liderato sa Senado.
Gikatakda ang pre-trial conference sa Senate impeachment court sa Hunyo 18, samtang ang pormal nga pagsugod sa impeachment trial batok sa Bise Presidente mao sa Hulyo 6, 2026.