Gipasabot ni House Committee on Good Government and Public Accountability chairman ug Manila Rep. Joel Chua nga ang nakatakdang pagdungog sa Abril 14 alang sa impeachment case batok kang Vice President Sara Duterte limitado ra sa mga clarificatory questions ug dili pa usa ka paglitis.
Sumala ni Chua, ang proseso sa Kamara bahin pa lamang sa preliminary investigation.
Gipasiugda sa kongresista nga walay cross-examination nga mahitabo sa niining yugto kay kini eksklusibo nga ginabuhat sa Senado.
Dugang pa usab ni Chua nga ang paggamit sa termino nga ‘mini-trial’ simpleng paghulagway lamang sa proseso.
Gi-imbitahan sa maong pagdungog ang pipila ka importanteng resource persons, lakip na ang mga opisyal gikan sa Commission on Audit (COA), Bureau of Internal Revenue (BIR), NBI, SEC, ug si Ramil Madriaga nga giingong “bagman” sa bise presidente.
Ang tumong sa pagtawag sa mga testigo mao ang pagsiguro sa awtentisidad sa mga pirma ug affidavit nga gisumite sa komite.
Gihulagway usab ni Chua nga ang papel sa komite sama sa usa ka prosecutor nga naghan-ay kung adunay igo nga basehan ang mga alegasyon aron ituloy ang kaso.
Bisan pa niini, gipasalig sa mambabalaod nga girespeto ang due process ug gihatagan og igo nga kahigayunan ang kampo sa Bise Presidente nga makatubag sumala sa mga lagda sa Konstitusyon.