Gibutyag ni kanhing Magdalo Partylist Representative Garry Alejano nga daan na niya gilauman nga adunay walo ka dagkong pangalan nga mahimong co-perpetrators ni kanhing Pangulong Rodrigo Duterte.
Si Alejano mao ang usa sa mga nagpasaka sa kaso batok sa kanhi pangulo sa International Criminal Court (ICC).
Sumala sa kanhing mambabalaod nga ang mga co-perpetrator nga giila sa ICC nga tanan aduna’y dakong papel sa drug war sa miaging administrasyon ni Duterte.
Gidugang pa niini nga ang uban sa mga napangalanan kay bahin usab sa mga dokumento nga ilang gisumite sa ICC kaniadto, labi na ang mga opisyal nga direktang nalambigit sa unang hugna sa pagpamatay sa drug war.
Gipasabot ni Alejano, dili mahimo sa kanhi pangulo ang halapad nga drug war kung wala ang direktang tabang sa mga co-perpetrator nga adunay lawom nga kahibalo sa gipatuman nga sistema.
Gibalikan usab niya ang mga nahitabo sa dihang siya pa ang nagserbisyo sa Kongreso ug si Duterte ang pangulo sa Pilipinas.
Matod niya, kasagaran hadlok ang publiko ug mga government officials gumikan kabalo sila nga kung supakon o suwayon ang kanhi pangulo, adunay dakong kalalagyan kini, tungod sa lawom nga impluwensiya ni Duterte.
Kini usa usab ka pamatuod nga adunay uban nga nalambigit sa drug war nga gi-implementa sa kanhi pangulo, sama sa mga co-perpetrator nga giila sa international tribunal.