Mikabat sa P6,727,751.20 ang kantidad sa mga kontrabando nga nakumpiska sa Police Regional Office 10 (PRO-10) atol sa mga operasyon sa Northern Mindanao gikan Septiyembre 10 hangtod 16, 2026, diin 145 ka mga indibidwal ang nadakpan.
Sa kampanya batok ilegal nga droga, 65 ka operasyon ang gihimo nga miresulta sa pagkadakop sa 65 ka indibidwal ug pagkumpiska sa 590.497 gramos nga shabu nga nagkantidad og P4,015,257.
Nasakmit usab ang P2,498,480 nga kantidad sa mga gituohang smuggled nga sigarilyo, samtang 11 ang nadakpan sa 12 ka operasyon batok ilegal nga pagmina ug nakumpiska ang mineral ores ug heavy equipment nga nagkantidad og P212,225.
Sa kampanya batok wanted persons, 57 ang nadakpan, lakip ang 14 ka Most Wanted Persons ug 43 ka Other Wanted Persons. Upat ang nadakpan sa 13 ka operasyon batok loose firearms, diin 13 ka gagmayng armas ang nakumpiska, misurender o narekober.
Samtang, walo ang nadakpan sa tulo ka operasyon batok ilegal nga sugal ug nakumpiska ang mga gamit sa pagpanugal nga nagkantidad og P1,789.
Padayon usab nga gipakusgan sa PRO-10 ang intelligence-driven operations batok ilegal nga mga kalihokan sa tibuok Northern Mindanao.