Gibutyag sa usa ka empleyado sa SYMS Construction sa Sandiganbayan nga nagdala sila og mga P299 million nga cash nga gisulod matud pa sa mga kahon sa grocery ug gidala sa opisina ni kanhi Department of Public Works and Highways (DPWH) Assistant District Engineer Brice Hernandez.
Giila ang testigo nga si Monica Ocampo-Santos, usa ka liaison officer sa SYMS Construction, gipamatud-an niini nga ang maong kwarta para matud pa sa lima ka government infrastructure projects nga nakuha sa kompanya gamit ang lisensya nga gipahulam ni Hernandez.
Sa testimonya niini, miluwat si Ocampo-Santos nga lakip sa maong kantidad ang P74 million nga may kalabotan sa giingong ghost projects nga nagkantidad og P92.8 million sa Pandi, Bulacan.
Gipakita usab niini sa korte ang mga mensahe nga nagpakita sa iskedyul sa paghatod sa kuwarta ngadto sa kanhing DPWH opisyal.
Sa parehas nga pagdungog, matud ni Ocampo-Santos nga pipila ka opisyal sa DPWH, lakip si Hernandez ug ubang district engineers ang nahimong principal sponsors sa iyang kasal diin nga giingon usab nga hangyo sa iyang amo.