Gi-awhag ni Most Rev. Noel P. Pedregosa, Obispo sa Diocese of Malaybalay, ang mga magtutuo nga Katoliko sa pagpalawom sa ilang pagtuo pinaagi sa pag-ampo, pagpamalandong, ug pagbuhat og kalooy (acts of charity) karong panahon sa Kwaresma isip pagpangandam sa Easter Sunday.
Matod sa Obispo, ang Kwaresma usa ka 40 ka adlaw nga panahon sa paghinulsol ug pagpahilayo una sa mga kalibutanong kalihokan aron pamalandungan ang Misteryo Paskwal ni Kristo—ang Iyang pag-antos, kamatayon, ug pagkabanhaw. Gipahimangnoan niya ang tanan nga dili kini angay tan-awon nga ordinaryong panahon, kundili higayon sa kinasingkasing nga pag-ampo, halapad nga pagtabang sa nanginahanglan, ug paghalad og personal ug katilingbanong sakripisyo.
Dugang pa, gipasabot ni Pedregosa nga ang mga pagsulay sa kinabuhi mahatagan og mas lawom nga kahulugan kon kini ikonektar sa pag-antos ni Kristo, nga maoy maghatod ngadto sa grasya ug kaluwasan. Gitumbok usab niya nga ang Kwaresma adunay social responsibility, diin gidasig ang mga tumutuo sa pagtabang sa isigkatawo ug sa aktibong pakiglambigit sa komunidad.
Samtang, gipahayag sa Obispo nga ang Easter Sunday mao ang kinapungkayan sa Kwaresma, nga nagpahinumdom nga walay pagkabanhaw kon walay pag-antos ug kamatayon, busa gikinahanglan ang sinsero ug lawom nga pagtuo sa pagsaulog sa Semana Santa.