Gipasalig sa National Food Authority (NFA) – Bukidnon nga nagpabiling bastante ang suplay sa bugas ug humay sa tibuok probinsya.
Sa pakigjhinabi sa Bombo Radyo Malaybalay Bukidnon ngadto na kang Glenn A. De Otoy, Information Officer sa maong buhatan, gibutyag niini nga adunay mokabat sa 170,000 ka sako sa humay ang nakareserba sa mga warehouse sa NFA.
Matud niini, ang maong pondo gitagana isip buffer stock nga magamit sa higayon nga adunay mga kalamidad, emerhensya, o krisis nga mahitabo sulod ning lalawigan.
Bisan paman nga adunay igong stocks sa humay ug bugas sa Bukidnon, gipasabot niini nga adunay epekto sa presyo sa mga basic commodities ang padayon nga kagubot sa Midlle East ilabi na sa mga batakang palaliton, apan sa pagkakaron hingpit ang paningkamot sa ilang buhatan sa pagmugna og mga programa aron makahatag og affordable nga presyo sa bugas ilabi ngadto sa mga vulnerable sectors.
Dugang pa niini nga hugot usab ang paningkamot sa ilang buhatan sa pagpangandam sa pagsaka sa presyo sa mga batakang palaliton pinaagi sa pakigtambayayong sa Department of Agriculture (DA).
Gipasabot ni De Otoy nga gipahugtan ang usa mga programa niini, ang Food Terminal Incorporated (FTI) kalabot na sa pagsuplay sa tag P20.00 diin gisugdan na sa lungsod sa Maramag.