Gisugdan na sa National Bureau of Investigation (NBI) ang pag-isyu og subpoena sa mga celebrity nga si Michelle Dee, Rhian Ramos, ug ang beauty queen nga si Samantha Panlilio mahitungod sa mga seryosong pasangil batok sa tulo.
Gikumpirma ni Atty. Maggie Abraham-Garduque, ang legal counsel ni Dee, nga nadawat na ang maong kamanduan sa miaging semana human ang kampo nipasaka og entry of appearance.
Ang maong lakang nagsumikad sa alegasyon nga pagpangulata ug ilegal nga pagdetinar sa kanhi driver ni Ramos nga giila sa alyas nga “Totoy” niadtong Enero 17 hangtod 19, apan kining tanan una nang gihimakak sa kampo sa mga akusado.
Gipasalig sa abogado ni Dee nga tumanon sa kliyente ang subpoena aron mapatin-aw ang kamatuoran sa maong isyu.
Samtang naglaum ang kampo ni Michelle Dee nga makab-ot ra ang hustisya sa dili madugay, nagpabilin pa nga hilom ang kampo ni Rhian Ramos ug Samantha Panlilio ug wala pa’y gi-isyu nga opisyal nga pamahayag kalabot niini.