Gilauman sa House prosecution nga adunay importanteng impormasyon ang testimonya ni National Bureau of Investigation (NBI) Director Melvin Matibag kalabot sa kinatibuk-ang imbestigasyon sa giingong mga hulga ni Vice President Sara Duterte batok kang Presidente Ferdinand Marcos Jr. ug sa iyang pamilya.
Sumala kang House prosecutor Terry Ridon, dili pa niini mahimong hisgutan ang mga detalye sa gilaumang testimonya tungod kay mawala matud pa ang epekto sa giingong “pasabog.”
Matud ni Ridon, mas maayong hulaton ang pagtestigo ni Director Matibag.
Si Matibag ang magsilbing katapusang testigo sa prosekusyon ubos sa Article IV sa impeachment complaint, nga nagtuki sa mga pamahayag ni Duterte batok sa presidente, First Lady Liza Araneta-Marcos ug kanhi Speaker Martin Romualdez.
Gipasabot ni Ridon nga ipresentar ni Matibag ang kinatibuk-ang resulta sa imbestigasyon sa NBI, lakip ang papel sa ubang opisina sa ahensya, ug dili lamang ang teknikal nga mga nadiskobrehan sa Cybercrime Division nga una nang gipresentar sa mga testigo nga sila NBI Regional Director Jeremy Lotoc ug Senior Agent John Mark Calilung.