Gipailawom sa usa ka intensive livelihood training program ang 25 ka mga kanhi rebelde kun “Friends Rescued” niadtong Mayo 6, 2026, didto sa Barangay Burgos, Oroquieta City, Misamis Occidental, pinaagi sa hiniusang paningkamot sa 1002nd Maneuver Company sa RMFB 10, 10th IB sa Philippine Army, ug TESDA.
Ang maong mga partisipante gibansay sa pagluto ug pag-bake ubos sa pagdumala ni Ms. Ethel Jane Kimiging aron mahatagan sila og market-ready nga mga kahanas nga magamit sa pagpangita og trabaho o pagsugod og gamay nga negosyo sa hospitality sector.
Atol sa programa, gipasiatab ni Police Major Alvin M. Tamayo nga ang maong inisyatiba dili lang usa ka simpleng pagbansay kondili usa ka bulawanong oportunidad alang sa mga benepisyaryo nga makabaton og bag-ong sinugdanan ug dungganong panginabuhian alang sa ilang mga pamilya.
Mitambong usab si 2nd Lt. Mark Allan De Sevilla aron ipakita ang padayong suporta sa kasundalohan sa reintegrasyon sa mga dating rebelde, isip kabahin sa mas lapad nga tinguha sa gobyerno nga makab-ot ang malungtarong kalinaw ug kalambuan pinaagi sa paspas nga serbisyo ngadto sa komunidad.Â