Patay ang usa ka batang pedestrian human kini aksidenteng matumbahan ug maligsan sa usa ka FUSO Canter truck sa Purok 2, Barangay San Antonio, Talakag, Bukidnon alas-3:55 sa hapon niadtong Hunyo 23, 2026.
Sumala sa imbestigasyon sa kapulisan, nagbiyahe ang puti nga trak paingon sa Purok 4 sa maong barangay gikan sa Talakag Proper sa dihang kalit nga mitabok ang menor de edad gikan sa sidlakang bahin paingon sa kasadpan sa dalan.
Tungod niini, naigo ug naligsan ang biktima nga miresulta sa grabeng kadaot sa lawas. Gidala sa mga ginikanan ang biktima sa Bukidnon Provincial Hospital–Talakag apan gideklarang dead on arrival sa attending physician.
Ang drayber, uban ang maong sakyanan, gidala na sa Talakag Municipal Police Station alang sa dokumentasyon ug hustong disposisyon.