Nagpahigayon og hugot nga hot pursuit operation ang kapulisan human sa duha ka managlahing insidente sa pagpamusil ning dakbayan sa Bukidnon nga miresulta sa kamatayon sa duha ka indibidwal.
Patay ang usa ka 39-anyos nga lalaki human kini giatangan ug gipaulanan og bala sa duha ka wala pa mailhing suspetsado sa Barangay 1B, Poblacion, Quezon, Bukidnon.
Sa pakighinabi sa Bombo Radyo Malaybalay kang Sheila Joy P. Jangad, tigpamaba sa Bukidnon Police Provincial Office, nasayran nga nagmaneho ang biktima sa iyang motorsiklo sa dihang kalit kining giatangan sa mga suspek nga armado og .45 pistol ug 9mm nga pistola.
Ang biktima nakaangkon og daghang samad pinusilan ug gideklara nga dead on arrival sa Quezon Health Infirmary Hospital.
Sa pikas bahin, usa usab ka 46-anyos nga lalaki ang nakabsan sa kinabuhi samtang angol ang 43-anyos nga asawa niini human sila gipusil sa Purok 8, Barangay Bizmarts, Don Carlos, Bukidnon.
Base sa imbestigasyon, nangandam sa trabaho ang magtiayon taknang alas 4:20 sa kaadlawon niadtong milabayang adlaw sa dihang kalit silang giduolan sa usa ka wala mailhing lalaki ug gipusil sa makatulo ka higayon.
Nakaangkon og samad sa tuo nga paa ang bana nga hinungdan sa iyang kamatayon, samtang ang asawa anaa na sa maayong kahimtang sa balay tambalanan.
Nasayran nga wala na gipahigayon ang SOCO processing sa lugar tungod kay nakonsidera kining contaminated o nahugawan na sa mga tawo sa wala pa moabot ang mga responder.
Narekober sa kapulisan ang duha ka basiyo sa bala nga isumiter na alang sa ballistic examination.
Sa gihimong pagsusi sa crime scene, narekober sa mga otoridad ang lima ka basiyo sa kalibre .45 ug siyam ka basiyo sa 9mm Human sa panghitabo, daling miikyas ang mga suspek paingon sa wala matino nga direksyon diin nagpadayon karon ang manhunt operation sa Quezon Municipal Police Station.