Personal nga desisyon ang pagpili ni Bise Presidente nga dili motambong sa State of the Nation Address ni Pangulong Ferdinand Marcos Jr. sa Hulyo 28, 2025.Tubag kini sa Malacañang human pangutan-a og reaksyon sa pamahayag ni Bise Presidente Sara Duterte sa Kamara nga dili siya motambong sa ika-upat nga State of the Nation Address (SONA) ni Pangulong Bongbong Marcos sa Hulyo 28.
Matod ni Palace Press Officer Claire Castro, desisyon na gyud ni VP Sara kung dili niya gusto maminaw sa mga programa ug mga nahimo sa Pangulo.
Sa wala pa niini, giingon ni House Secretary General Reginald Velasco nga nagpadala og abiso ang buhatan sa Bise Presidente sa wala pa ipadala ang pormal nga imbitasyon alang sa mga opisyal sa gobyerno, diplomatic corps, ug mga VIP guests.
Bisan pa man niini, matod ni Velasco nga isip kabahin sa protocol, mag-andam gihapon sila og lingkoranan para kang VP Sara sa tunga-tunga sa gallery o VIP gallery gawas pa sa holding room nga gitagana para kaniya ug sa iyang staff.
Kini na ang ikaduhang higayon nga wala motambong si VP Sara sa SONA ni Presidente Marcos human usab sa iyang wala pagtambong sa miaging tuig diin iyang gitagana ang kaugalingon nga “designated survivor.”