Emosyonal nga gipanghimakak sa aktres nga si Lotlot de Leon ang mga hungihong nga interesado sila sa iyang mga igsoon sa kabilin o mana nga gibilin sa ilang mitaliwan nga inahan, ang Superstar ug National Artist nga si Nora Aunor.
Kini nga isyu misilaob atol sa unang anibersaryo sa kamatayon sa Superstar, diin nagpahayag ang iyang igsoon nga si Ian de Leon nga siya ang nag-inusarang “sole legal heir” ug maoy modumala sa tanang legal nga kabtangan ug estate sa ilang inahan.
Sumala ni Lotlot, wala sila’y gihangyo o gihulat nga bisan unsang mana, ug kon duna man ugaling gibilin nga yuta didto sa Bicol, andam silang ihatag kining tanan ngadto kang Ian aron mahunong na ang mga bakak. Giklaro pa sa aktres nga igo ug dako na kaayong grasya alang kaniya nga matawag nga inahan si Nora Aunor ug mapadako sa usa ka haligi sa industriya. Una na usab nga mipadungog-dungog ang iyang igsoon nga si Matet de Leon pinaagi sa usa ka post diin giingon niini nga wala silay paki sa maong mana.