Miabot sa White House si Ukrainian President Volodymyr Zelensky aron makipagtagbo kang U.S. President Donald Trump, diin naglaum kini nga makakuha og dugang anti-ballistic missile defense systems taliwala sa nagkahait nga giyera batok sa Russia.
Gawas sa pagpangayo og dugang nga mga suplay sa hinagiban, sulayan usab nga hangyoon ni Zelensky si Trump nga mahatagan ang Ukraine og lisensya aron sila mismo ang makahimo og ilang kaugalingong Patriot interceptor missiles (PAC-2 ug PAC-3).
Matud sa pangulo sa Ukraine, ang pagbaton og lokal nga produksyon sa maong mga missile magsilbing dako nga panagang batok sa nagkadaghang ballistic missiles ug drone attacks gikan sa Russia—diin gitaho sa alkalde sa Moscow nga miabot sa 390 ka mga drone ang mitarget sa ilang dakbayan sa naglabay nga gabii.