Gitulis sa wala pa mailhing suspek ang usa ka lalaki nga nabilin sulod sa sakyanan sa iyang amo pasado alas 11:00 sa buntag niadtongniadtong milabay’ng adlaw, sa Lower Pinamaloy, Barangay Pinamaloy, Don Carlos, Bukidnon.
Base sa report sa PNP-Don Carlos, giparking sa 33-anyos nga babaye ang iyang Toyota Hilux gawas sa usa ka furniture shop ug gibiyaan sulod sa sakyanan ang iyang 26-anyos nga empleyado.
Matud sa biktima, kalit nga giablihan sa usa ka wala mailhing lalaki nga nagsul-ob og itom nga jacket ug puti nga helmet ang pultahan sa sakyanan ug gitiunan kini og gituohang armas.
Gikuha sa suspek ang sling bag sa tag-iya sa sakyanan nga adunay mga ATM card, passbooks ug P3,000 nga kuwarta. Human sa krimen, mikagiw ang suspek sakay sa usa ka itom nga Honda XRM paingon sa wala masayring direksyon.
Padayon pa ang imbestigasyon sa PNP aron mailhan ug madakpan ang suspek.