Gibatikos sa mga labor group ang Department of Labor and Employment o DOLE tungod sa pagpagawas sa bag-ong wage order sa Metro Manila nga naghatag og P60 nga dugang sa minimum wage.
Matud ni Trade Union Congress of the Philippines spokesman Carlos Miguel Oñate, malimbungon ang Wage Order NCR-28 tungod kay wala matud pa mahibaw-i sa mga trabahante nga ang konsultasyon niadtong Septiyembre 2 mahimong basehan sa bag-ong wage order.
Gikuwestiyon usab sa grupo ang pagpagawas niini samtang anaa pa sa court injunction ang Wage Order NCR-27 nga naghatag og P85 nga dugang sa suhol.
Gilauman nga mahimong ipatuman ang bag-ong P60 wage increase sa Septiyembre 26 o 27.
Samtang, gipatin-aw ni Labor Secretary Francis Tolentino nga ang P60 dili pagminus sa P85 tungod kay wala pa kini maipatuman.