Gibarugan sa House prosecution panel nga nagpabiling intact ug wala matay-og ang ilang kredibilidad luyo sa gipagawas nga affidavit ug testimonya sa 18 ka mga kargador kalabot sa impeachment case batok kang Bise Presidente Sara Duterte. Matod ni Batangas Representative Gerville “Jinky Bitrics” Luistro, puno sa mga kontradiksyon ug dili pagkahaom ang pamahayag sa maong mga kanhi Marino nga tataw kaayong nakita sa publiko, hinungdan nga nagpabiling lig-on ug masaligon ang 11 ka mga House prosecutors.
Dungan niini, gipahayag sab ni Kabataan Party-list Rep. Renee Co ug Akbayan Rep. Chel Diokno nga mas gikuwestiyon pa sa katawhan ang kredibilidad sa maong mga testigo kaysa sa panel. Gitataw sa mga magbabalaod nga nakatutok ang impeachment trial sa mga bug-at ug konkretong ebidensya nga ipresentar ngadto sa Senado, ug andam na silang moatubang sa impeachment court alang sa pre-trial conference karong Hunyo 18 dungan sa pormal nga paglilitis karong Hulyo 6.
Gumikan niini, nanawagan ang prosecution panel sa mga tulunghaan, labi na sa mga law school ug civil society groups, nga magpahigayon og mga watch party pinaagi sa livestream. Tumong niini nga masubaybayan ug mas masabtan sa tibuok nasod ang dagan sa maong makasaysayanong paglilitis alang sa tulubagon sa mga labing taas nga opisyal sa kagamhanan.