Gihandus karong adlawa ni Manila 6th District Representative Benny Abante ang pormal nga reklamong libel ug cyberlibel batok sa 18 ka kanhing bodyguards ni dating Ako Bicol Party-list Rep. Saldi Co, lakip ang ilang abogado nga si Atty. Levito Baligod. Sa iyang pag-atubang sa City Prosecutor’s Office sa Maynila, hugot nga gihimakak ni Abante ang mga pasangil nga nakadawat siya og minilyon gikan sa anomalya sa flood control projects, ug gipahayag nga andam niyang limpyohan ang iyang pangalan sa bisan unsang tribunal.
May kalabutan niini, mipadayag og kaandam ang kampo ni Atty. Baligod nga motambong sa pakisusi sa Senate Blue Ribbon Committee ubos sa paksyon ni Senador Win Gatchalian. Apan miangkon ang abogado nga duna silay dakong pagduhaduha kon si Senador Erwin Tulfo ang manguna sa pagdungog tungod sa conflict of interest. Gikabalak-an sa grupo nga mamahimo silang ma-cite in contempt ug mapriso sa Senado kon pasanginlan nga namakak, sanglit usa si Tulfo sa mga magbabalaod nga una nilang gikalambigit sa maong anomalya—bisan pa man og hugot na kining gihimakak sa senador. Matod ni Baligod, anaa na sa diskresyon ni Tulfo kon mo-inhibit ba kini sa imbestigasyon alang sa makiangayong pagdungog.