Niabot na sa nasod ang sikat nga Chinese actress nga si Zhang Yingfei, kinsa nailhan pag-ayo sa mga Pilipino isip si “Linda Walker” sa nag-viral nga micro-drama nga The Heiress Who Won With Brains. Ang iyang pagbisita sugod karong Hunyo 8 hangtod 11 natunong gayod sa pag-abli sa klase sa tibuok nasod.
Gidapit si Yingfei sa Federation of Filipino Chinese Chambers of Commerce & Industry, Inc. (FFCCCII) alang sa ilang kampanya nga “Education for a Better Future.” Tumong sa maong adbokasya nga dasigon ang mga estudyanteng Pilipino nga hatagan og dako nga bili ang edukasyon, disiplina, ug kakugi aron mabuntog ang kalisod sa kinabuhi, sama sa gipakita sa iyang karakter sa maong serye.
Lakip sa mga nakalinya nga kalihokan sa 22-anyos nga aktres mao ang pagbisita sa Manila City Hall alang sa usa ka courtesy call kang Mayor Isko Moreno, pagsuroy sa mga makasaysayanong dapit sa Intramuros ug Binondo, ug ang pagpahigayon og charity outreach sa Quezon City High School aron mang-apud-apod og mga gamit sa eskwela ug hygiene kits ngadto sa mga estudyante.