Napakyas ang kapulisan sa Bukidnon sa pagsikop sa usa ka regional target nga kanhing Job Order sa lokal nga kagamhanan sa Malaybalay City human gisilbihan og Search and Seizure Warrant ang iyang pinuy-anan sa Barangay Miglamin, pasado alas 4:16 sa hapon, Nobyembre 12, 2026.
Ang suspek nga nailhang si alyas Dako, hingkod ang panuigon, wala maabti sa iyang balay atol sa operasyon sa Bukidnon Provincial Drug Enforcement Unit ug nagpabiling wala pa masikop.
Bisan pa niini, nakumpiska sa mga otoridad ang unom ka dagkong pakete ug upat ka gagmayng sachet sa gituohang shabu nga motimbang og 40.4 gramos, nga nagkantidad og P274,720, ug upat ka pakete sa gituohang marijuana nga motimbang og 40 gramos ug nagkantidad og P4,800.
Narekober usab ang nagkalain-laing drug paraphernalia atol sa pagpanghimatuod sa balay uban ang presensya sa duha ka barangay kagawad isip mga saksi.
Ginaandam na sa kapulisan ang kasong ipasaka batok sa suspek tungod sa posibleng paglapas sa Republic Act 9165 o Comprehensive Dangerous Drugs Act of 2002.

