QUEZON, BUKIDNON — Yagba ug luwas na sa peligro ang usa ka 55-anyos nga babaye human kini gipusil sa iyang sarang silingan ug kaubanan niini sa Purok Demokrasya, Barangay Salawagan, Lungsod sa Quezon, Bukidnon.
Base sa imbestigasyon sa Quezon Municipal Police Station, nagbarog ang biktima sa gawas sa iyang balay samtang naghulat sa iyang bana dihang niduol ang iyang silingan kauban ang usa ka wala mailhing lalaki ug gipusil kini kausa sa wala nga bahin sa iyang pisngi.
Paspas nga miikyas ang mga suspek sakay sa usa ka puti nga XTZ motorcycle paingon sa interior nga dapit sa Barangay San Roque. Bisan pa man sa naangkong samad sa nawong, nakaluwas ug pabilin nga conscious ug stable ang kahimtang sa biktima diin gidala kini sa Northern Mindanao Medical Center (NMMC) sa Cagayan de Oro City.
Nakuha sa lugar ang usa ka basiyo sa kalibre .45 nga baril. Samtang gipatuman na sa kapulisan ang Oplan Shield ug Containment Ring Plan alang sa padayon nga hot pursuit operation batok sa mga nakaiyas nga suspek, sumala sa taho ni Bukidnon Police Provincial Director PCOL Oliver Sotto Navales.