Nanawagan ang National Grid Corporation of the Philippines (NGCP) sa mga lokal nga panggamhanan nga dugangan ang pamuhunan sa baseload power plants aron matubag ang padayon nga pagsaka sa panginahanglan sa kuryente sa Visayas nga nakaapekto sa mga linya sa tibuok nasud.
Matud sa NGCP, niadtong Mayo 14 narekord ang labing taas nga konsumo sa kuryente sa Visayas nga niabot sa dul-an 2,780 megawatts.
Tungod niini, napugos ang grid sa pagkuha og dugang suplay sa kuryente gikan sa Luzon ug Mindanao aron matubag ang panginahanglan sa mga konsumidor.
Gipadayag usab sa NGCP nga kadaghanan sa Yellow Alert ug Red Alert sa Visayas tungod sa kalit nga paghunong sa operasyon sa pipila ka mga power plant.
Ang Yellow Alert nagpasabot nga nipis na ang reserbang suplay sa kuryente, samtang ang Red Alert nagpasabot nga kulang na ang produksyon sa kuryente ug mahimong mosangpot sa rotational brownout.
Gipasabot usab sa NGCP nga bisan padayon ang paggamit sa renewable energy sama sa solar power, dili pa kini igo aron masiguro ang padayon ug lig-on nga suplay sa kuryente, ilabina kon adunay daotang kahimtang sa panahon.