Usa ka startup company sa United Kingdom ang nagpaila og bag-ong paagi sa permanenteng tattoo nga giingong halos walay sakit ug dili na kinahanglan gamitan sa tradisyonal nga tattoo machine.
Gigamit sa London-based nga Cipher X ang gitawag nilang “Microdot” patch nga adunay ilabihan ka gagmay’ng dagom.
Imbes nga balik-balikon ang pagtusok sama sa kasagarang tattoo, ang microscopic needles usa ra ka higayon motandog sa panit aron masulod ang tinta.
Matud sa kompanya, gimugna kini sa ilang CEO nga si Ferdinand Kohle tungod sa iyang kahadlok sa dugo ug mga dagom.
Tumong niini ang paghatag og mas paspas ug mas komportable nga paagi sa pagpatattoo alang sa mga gustong adunay permanenteng tattoo apan naglikay sa kasakit sa tradisyonal nga proseso.
Sa mga nakasulay na niini, ilang giingon nga halos wala sila makabati og kasakit, pagdugo, o iritasyon. Apan, gikinahanglan pa gihapon ang dugang nga pag-obserbar aron masuta ang kalig-on ug kadugayon sa resulta.