Nakakumpiska ang Police Regional Office 10 (PRO-10) og kapin ₱140 milyones nga kantidad sa shabu ug marijuana taliwala sa gipakusog nga anti-illegal drug operations sa tibuok Northern Mindanao.
Sumala ni PRO-10 Spokesperson PMaj. Joann G. Navarro, ang maong sunod-sunod nga operasyon nakadirekta sa mga high-value individuals ug mga sindikato nga nag-apod-apod og droga gikan sa ubang rehiyon. Gani, sa nakalabay nga semana lamang, kapin ₱3 milyon nga kantidad sa kontrabando ang nasakmit sa Cagayan de Oro City, Misamis Occidental, ug Lanao del Norte. Gitoknan ni Navarro nga ang pagtaas sa presyo sa iligal nga droga nagpakita nga mas nagkalisud na ang pagpalusot niini tungod sa gipahugtan nga operasyon sa kapulisan.
Dugang pa sa kapulisan, gawas sa pagpanakop, gipahimug-atan usab ang rehabilitasyon pinaagi sa Community-Based Rehabilitation Program (CBRP) ug pagpalig-on sa Barangay Anti-Drug Abuse Councils (BADAC). Gihatagag aksyon usab ang internal cleaning sa ahensya diin duha ka dismissed police officers nga nalambigit sa droga ang nasikop niadtong Hulyo.
Kasamtangang nagpadayon ang masugtanong pagmonitor sa PRO-10 sa mga dapit nga adunay taas nga kalihokan sa iligal nga droga lakip na sa Cagayan de Oro City, Bukidnon, Valencia City, ug Lanao del Norte, uban ang panawagan sa publiko nga maghatag og importanteng impormasyon aron mapakgang ang maong kalihokan.