Padayon ang imbestigasyon sa Bureau of Fire Protection (BFP) sa sunod-sunod nga insidente sa sunog nga nahitabo sa probinsya sa Bukidnon.
Sa pakighinabi sa Bombo Radyo Malaybalay kang Rene Rubillos, Operations Chief sa Bureau of Fire and Protection-Bukidnon, gibutyag niini nga sa Maramag, gikatahong miabot sa P28 milyon ang structural damage human masunog ang usa ka bodega sa Purok-1A, North Poblacion.
Base sa impormasyon nga nakalap, gibanabana nga sulod sa unom ka oras nga gipaningkamotan sa mga bombero nga mapalong ang kalayo nga misaka pa sa ikatulong alarma.
Hinuon, wala usab natala nga nasamdan sa maong insidente.
Samtang sa Manolo Fortich, usa ka 13-anyos nga babaye nga Person With Disability (PWD) ang nakabsan sa kinabuhi human masunog ang kaugalingong balay sa Zone 1, Barangay Alae.
Samtang nakalingkawas ang 7-anyos nga igsuon niini pinaagi sa pag-ambak sa bintana ug gikataho nga ang ginikanan anaa pa sa trabaho.
Ang maong balay nga hinimo lamang sa light materials hinungdan nga dali kining naugdaw ug gibana-banang P15,000 ang kantidad sa damyos niini.
Samtang saa Valencia City, minimal lamang ang kadaot sa usa ka furniture store sa Purok 9, Poblacion human kini masunog pasado alas 4 sa hapon.
Matud ni Rubillos, nga gikataho nga nagsugod ang kalayo tungod sa power interruption ug ulan nga nagtulo padulong sa outlet ug misilaab.
Gibanabana nga P5,000 ang kadaot tungod sa pagkasunog sa sofa.