Gideklara sa International Criminal Court (ICC) Pre-Trial Chamber 1 nga si kanhi Presidente Rodrigo Duterte “fit” o anaa sa saktong panglawas ug kondisyon aron moapil sa pre-trial proceedings nga gikatakda karong umaabot nga Pebrero 23, 2026.
Kini nga desisyon sa korte nagpasabot nga walay nakitang babag sa kahimtang sa panglawas sa kanhi presidente aron dili siya moatubang sa maong legal nga proseso. Ubos sa kamanduan sa ICC, ang maong adlaw mao usab ang pagpahigayon sa confirmation of charges hearing diin pormal nga susihon ang mga ebidensya kon duna ba gayoy igong basehan ang mga pasangil batok kaniya.
Gilauman nga ang maong pagdungog magatututok sa mga isyu kalabot sa gipatuman nga “war on drugs” sa panahon sa iyang administrasyon. Samtang nagkaduol ang maong petsa, nagpabiling hugot ang monitoring sa publiko ug sa nagkalain-laing grupo sa tawhanong katungod kon unsa ang mamahimong dagan sa hustisya sa maong internasyonal nga korte.