Hugot nga mipalag si kanhi Justice Secretary Vitaliano Aguirre II human malakip ang iyang ngalan sa listahan sa mga giingong “co-perpetrators” sa imbestigasyon sa International Criminal Court (ICC) kalabot sa “war on drugs” sa administrasyong Duterte. Sa usa ka eksklusibong pakighinabi sa Bombo Radyo Philippines, gihulagway ni Aguirre nga “completely false” o hingpit nga bakak ang mga pasangil batok kaniya.
Gipatin-aw sa kanhi kalihim nga ang iyang papel kaniadto mao lamang ang pagserbisyo isip legal counsel ni kanhi Presidente Rodrigo Duterte. Sumala pa kaniya, dili angay isipon nga usa ka krimen ang paghatag og legal nga tambag ngadto sa usa ka kliyente.
Sa pagtapos sa iyang pamahayag, gipadayag ni Aguirre nga andam niyang atubangon ang bisan unsang isyu nga ipasaka batok kaniya.
Giklaro usab niya nga wala siyay plano nga mokuha og mahal nga grupo sa mga abogado kon “battery of lawyers” tungod kay dako ang iyang pagsalig nga igo na ang iyang kaugalingong kinaadman sa balaod aron depensahan ang iyang kaugalingon.