Nagpagawas og direktiba ang Bukidnon Police Provincial Office ngadto sa tanang hepe sa kapulisan sa probinsya, partikular na sa dakbayan sa Malaybalay, aron pakusgan ang operasyon batok sa pagpamaligya og mga peke ug ilegal nga sigarilyo.
Sumala ni PCPT. Sheila Joy P. Jangad, ang tigpamaba sa Bukidnon Police Provincial Office, ila nang gimonitor ang mga gagmayng tindahan nga nalambigit sa maong ilegal nga buluhaton.
Tumong sa maong lakang nga masugpo ang pagpakatap sa mga sigarilyo nga wala nakapasar sa standard sa gobyerno ug nakalapas sa balaod.
Aron masiguro ang kalampusan sa maong kampanya, makig-alayon ang PNP sa Local Government Unit (LGU) ug sa Local Health Unit alang sa hiniusang pagkumpiska sa mga kontrabando. Â
Dugang pa sa opisyal nga gipakusgan usab sa Bukidnon Police Provincial Office ang kampayan batok sa ilegal nga droga pinaagi sa sunod-sunod nga mga buy-bust operations sa probinsya.
Matud nini nga ang ilegal nga droga dili lamang problema sa usa ka indibidwal kondili usa ka dakong “sakit sa katilingban.”
Gipasiugda niya nga ang epekto niini molapas sa tiggamit, tungod kay maapektuhan usab ang pamilya ug ang tibuok komunidad.Â