Gitudlo sa Civil Aviation Authority of the Philippines (CAAP) ang dili maayong kahimtang sa panahon isip nag-unang rason sa pagkalangan sa konstruksyon sa Bukidnon Airport.
Sa pakighinabi sa Bombo Radyo Malaybalay, gibutyag ni CAAP Area Manager Engr. Chito Halasan nga nalangan ang konstruksyon sa Bukidnon Airport tungod sa padayon nga pag-ulan.
Gidugang pa ni Engr. Halasan nga gimando na matud pa ni Senator Juan Miguel Zubiri sa mga contractor nga mapaspasan ang trabaho aron maabot ang gitakdang target sa pag-abli sa airport.
Gipadayag usab niini nga anaa na sa 1.44 ka kilometro ang nahuman sa runway nga adunay 45 metros ang gilapdon.
Ang kulang na lamang mao ang pagkompleto sa 2.1-kilometrong runway subay sa mando ni senador Migz Zubiri.
Gibutyag usab ni Halasan nga 100 porsyento nang nahuman ang Phase 1 ug Phase 2, samtang 98 porsyento na ang terminal building sa Phase 3.
Padayon usab ang pagtukod sa control tower, power house, cargo building ug fire station ubos sa Phase 4.
Target sa CAAP nga mahuman ang nahibiling mga trabaho sa Disyembre aron maoperahan ang Bukidnon Airport sa unang quarter sa 2027, nga gilauman nga matunong sa pagsugod sa Kaamulan Festival.